Прадпрыемствы павінны актыўней інвесціраваць у абсталяванне і тэхналогіі

Прадпрыемствы павінны актыўней інвесціраваць у абсталяванне і тэхналогіі, каб развіваць экспарт. Такое меркаванне выказаў  1 верасня журналістам у Віцебску прэм'ер-міністр Раман Галоўчанка, перадае карэспандэнт БЕЛТА.

Сёння ў час рабочай паездкі ў Віцебск прэм'ер-міністр прыняў удзел у адкрыцці вялікага школьнага комплексу ў маладым мікрараёне горада, а таксама наведаў у мэтах азнаямлення экспартна арыентаваныя прадпрыемствы ТАА "ВА "Энергакамплект" і ААТ "Канструктарскае бюро "Дысплэй".

Паводле яго слоў, вельмі важна, каб і іншыя прадпрыемствы актыўней працавалі на рынкі Еўропы. "Для нас гэта вельмі сур'ёзная задача, хоць пакуль не ўдаецца вырашыць яе так хутка, як хацелася б. Каб прадукцыя прадпрыемстваў была адпаведнай якасці, неабходна інвесціраваць у абсталяванне і тэхналогіі, праходзіць сертыфікацыю. Мы мэтанакіравана рухаемся ў гэтым напрамку, гэта наша мэтавая ўстаноўка, а не дыверсіфікацыя дзеля дыверсіфікацыі. Паколькі выхад на рынак краін Еўрасаюза азначае, што гэта прадукцыя высокатэхналагічная і канкурэнтаздольная. Калі яна прадаецца там, яна будзе прадавацца ўсюды", - падкрэсліў Раман Галоўчанка.

Гаворачы пра інфармацыйныя ўкіды аб прыпыненні дзейнасці некаторых вытворчасцей, Раман Галоўчанка адзначыў, што ўсе прадпрыемствы працуюць. "Хто хоча працаваць, той працуе. Дзе людзі заняты справай, часу на іншае не застаецца. Мы гэту тэму з парадку дня знялі. Яна ўкідваецца тымі, хто хоча выдаць жаданае за рэчаіснае", - канстатаваў прэм'ер-міністр.

БЕЛТА.